328茶座

營業中

休息中

呢味「鹹蛋蒸肉餅飯」，首先你會見到佢面層係幾乾身嘅。嗱我勺起一忽肉餅，你就見到肉底肉汁好豐富。點解呢Ｄ唔係倒汗水呢？理由好簡單－如果係倒汗水，咁肉面都會係好濕嘅，而呢一碟鹹蛋蒸肉餅只係肉底有水，因此，佢就只會係蒸出嚟嘅肉汁嘞。味道係點？講真，呢味餸要整得難食係難過要整得佢好食嘅，但係佢蒸得唔會太死實，又唔會鬆泡泡，總之送飯果種口感係好夾嘅，除左果一箸無厘頭嘅蔥花之外，我惟一可以彈嘅係佢Ｄ肉有些少黐底。至於鹹蛋就冇咩好講啦，最靚、出哂油嘅「高郵鹹鴨蛋」通常只會响月餅入面受到蓮蓉嘅保護，你要响中秋節果排先會食得到。呢個飯你要响呢間舖度食係需要一Ｄ運氣，我經驗之中一個星期佢最多只會出現兩次响餐牌之上，而唔係午飯同晚飯時間的話，佢仲會賣哂添！所以係需要剛剛碰上恰恰至會食得到嘅。