7 點左右到餐廳門口，已經被多個老夫子人物角色及場景吸引🤩，再次見到全場滿座，座無虛席，等位期間，梗係把握時間，瘋狂打卡先啦✌🏻。
等左一陣，好快就入座，餐廳環境依然保持乾淨寬敞，餐廳內同樣設有多個牆上圖案打卡位，連坐低見到餐紙都有老夫子漫畫，童年回憶返曬黎😉。
今次見到有多款老夫子推介嘅菜式，我地嗌左幾款試下
6
非同凡響 - 滷水鵝肝🦆
食得潮州菜，當然唔少叫滷味啦，而今次係老夫子推介菜式入面見到有滷水鵝肝，平時係其他鋪頭較少見，一於嗌黎試下。鵝肝滷得入味，每一片都大大塊，鋪滿成碟，鵝肝處理得十分乾淨，沒有異味，口感粉線滑，入口即化，可以點上米醋。鵝肝下層鋪滿芽菜，配搭埋鵝肝一齊食，口感更多左層次😋。
1
勢均力敵 - 鹹魚蒸馬友🐟
鹹魚蒸馬友又稱「馬友生死戀」，將馬友製作而成嘅鹹魚同新鮮馬友一齊清蒸。馬友油脂豐富肉質鮮美嫩滑，清蒸已經好好味，而且無咩骨，可以啖肉😆。
原來如此 - 蒜蓉炒番薯苗🍠
簡簡單單蒜蓉炒番薯苗已經好好味，大大碟，份量十足，番薯苗翠綠鮮嫩，炒得香味撲鼻，而且唔會好油膩👍🏻。
潮州蠔餅🦪
潮州菜又點少得蠔餅呢，大大塊蠔餅金黃色，十分吸引，脆卜卜入口酥脆香口，見到一粒粒脹卜卜嘅蠔仔，配搭埋魚露，既能辟除蠔嘅腥味，又能將鮮味昇華，味道一流，讓人食唔停口🤤。
總括而言，隔左一段時間再幫襯，水準繼續保持得好出色，菜式味道多元好味，絕不馬虎，好適合三五知己、一家大細一齊黎，仲要趁依家可以同老夫子打卡，千祈唔好錯過啦🤭！
陳儀興飯店 (將軍澳 嘉悅分店)
📍地址：將軍澳至善街9號嘉悅地下2-3號舖
