The BASE nature (已結業)

偶爾想放鬆，食下cake同飲下茶，可以嚟到荃新天地The Base，佢哋啲甜品唔錯，手工蛋糕有兩款，分別係紅莓芝士蛋糕同埋朱古力榛子蛋糕。揀左紅莓芝士蛋糕。蛋糕用黑色圓形嘅石碟盛載。伴碟有3粒藍莓。蛋糕分左三層，由上至下分別係紅莓醬、芝士同用消化餅整嘅餅底。一入口，已經食到紅莓嘅酸，好醒神醒胃呀！芝士好軟，質地近似乳酪。蛋糕面頭放左d餅碎，d餅好脆。跟餐送飲品。飲品款式好多，見到檸檬甘草茶隔離有個括號寫住N。原來N姐係「無咖啡因」。見到佢咁寫就一於試下啦！檸檬甘草茶冇乜檸檬味，比甘草味蓋過左，微甜。同酸嘅紅莓芝士蛋糕一齊食，甜同酸互相中和，味道啱啱好。一啖茶一啖蛋糕，好歎呀～另外一杯餐飲嗌左美式咖啡，奉送奶同糖供客人自己選擇落幾多。咖啡夠熱，好香。咖啡未飲淨係聞已經即刻醒神曬！加d奶落去，飲落好滑，唔會太苦，唔使落糖，味道啱啱好。