影片
更多
2024-10-18
1757 瀏覽
老婆大人最鍾意食海鮮！如果淨係我哋兩條友食嘅話一嚟唔食得多二嚟都好重皮下㗎！醒目嘅我梗係搵可以無限任食海鮮自助餐就最啱合尺。搵咗呢間我第一次嚟嘅歷山酒店，佢嘅CAFÉ A呢期做蟹同鮑魚主題價錢超級抵食，我喺酒店嘅網上訂枱俾埋錢就有七折連埋加一折實都係$550位，可以食足三個鐘真係好嘆㗎。行到酒店大堂估唔到咁金碧輝煌，感覺好瑰麗啱晒啲靚女喺度打卡。呢間就係CAFÉ A歷山餐廳地方唔算好大，但係食嘅選擇都幾多同埋好啱我胃口。一入到餐廳就見到呢個甜品櫃入面擺滿咗蛋糕甜品！有栗子忌廉蛋糕、藍莓芝士蛋糕、抹茶戚風蛋糕、抹茶栗子慕絲蛋糕、彩虹啫喱、抹茶牛奶布甸、栗子木糠布甸、柚子啫喱同埋楊枝甘露布甸，淨係呢個櫃已經鬼咁多嘢揀。最令我感興趣嘅就係呢個抹茶蛋糕同埋楊枝甘露布甸，老婆大人一眼就昅中個栗子忌廉蛋糕，相信今晚嘅甜品時間應該會腥風血雨哈哈。唔好以為剩係得個櫃行入啲仲有好多甜品！好似有即製㕴窩夫、焦糖燉蛋、芒果拿破崙、蛋撻、自助班戟機、麵包布甸、糖果曲奇、椰汁西米露同埋新鮮切件生果。雪糕佢哋係用Mövenpick都有五隻味揀㗎！有士多啤梨、椰子、咖啡、雲呢拿同埋朱古力味。男士們最鍾意嘅生蠔一樣有
搵咗呢間我第一次嚟嘅歷山酒店，佢嘅CAFÉ A呢期做蟹同鮑魚主題價錢超級抵食，我喺酒店嘅網上訂枱俾埋錢就有七折連埋加一折實都係$550位，可以食足三個鐘真係好嘆㗎。
行到酒店大堂估唔到咁金碧輝煌，感覺好瑰麗啱晒啲靚女喺度打卡。
呢間就係CAFÉ A歷山餐廳地方唔算好大，但係食嘅選擇都幾多同埋好啱我胃口。一入到餐廳就見到呢個甜品櫃入面擺滿咗蛋糕甜品！有栗子忌廉蛋糕、藍莓芝士蛋糕、抹茶戚風蛋糕、抹茶栗子慕絲蛋糕、彩虹啫喱、抹茶牛奶布甸、栗子木糠布甸、柚子啫喱同埋楊枝甘露布甸，淨係呢個櫃已經鬼咁多嘢揀。
最令我感興趣嘅就係呢個抹茶蛋糕同埋楊枝甘露布甸，老婆大人一眼就昅中個栗子忌廉蛋糕，相信今晚嘅甜品時間應該會腥風血雨哈哈。唔好以為剩係得個櫃行入啲仲有好多甜品！好似有即製㕴窩夫、焦糖燉蛋、芒果拿破崙、蛋撻、自助班戟機、麵包布甸、糖果曲奇、椰汁西米露同埋新鮮切件生果。
雪糕佢哋係用Mövenpick都有五隻味揀㗎！有士多啤梨、椰子、咖啡、雲呢拿同埋朱古力味。
男士們最鍾意嘅生蠔一樣有得食！即開生蠔仲有美國同埋愛爾蘭揀，一次過可以攞三隻走多幾轉回本就係咁簡單。
我鍾意食嘅刺身呢就有紅蝦、帶子、赤貝、吞拿魚、油甘魚、三文魚同埋八爪魚！睇落去就好新鮮喇等陣間食咗再包膠俾大家聽正唔正。如果鍾意食壽司都有幾款可以揀㗎。
今次佢哋做蟹嘅主題所以粥呢一part就有蟹粉鮑魚海鮮粥，仲有大蝦同埋青口加埋蟹粉嗰朕鮮味你都咪話正。
前菜區有芝士拼盤仲有我鍾意食嘅藍芝士，跟住有泰式無骨酸辣鳳爪、泰式香芒沙律、朝鮮薊雞肉沙律、明太子鮑魚牛油果沙律、雜菌沙律同埋皇帝蟹肉白酒啫喱凍批。另外仲有凍火腿、辣肉腸、沙樂美腸、煙三文魚、風亁火腿同埋自助沙律吧，如果細食真係食前菜都已經飽咗。
呢度凍海鮮有鱈場蟹腳、海螺、青口同埋凍蝦，四款都好新鮮而且好有海水味，啱晒鍾意食海鮮嘅朋友瘋狂去嘆。
呢晚中西湯分別係忌廉蘑菇湯同埋南瓜蟹粉素翅羹，我就鍾意忌廉蘑菇湯你呢。
呢度嘅中式熱菜特別出色！蒸得好靚嘅清蒸沙巴龍躉，然後仲有蟹黃粉絲蒸蟶子、蟹肉伊麵、鮑汁扣鵝掌、蝦籽柚皮、黑醋咕嚕肉同避風塘炒皇帝蟹軟殼蟹，每一款嘅質素都好高絕對可以全部試晒。
日本嘅熱食串燒有雞翼、大蝦、鰻魚、牛肉串、雞軟骨同玉桂菠蘿，唔好睇佢擺咁少喺度！客人攞完之後好快就會加返，我覺得咁仲好因為啲串燒會新鮮熱辣呀嘛。其他唔同國家嘅熱食都有唔少嘢揀㗎。好似有燒排骨、日式咖喱牛肉、黑松露薯蓉、泰式香茅海鱸魚、奶油焗卡邦尼鮑魚、皇帝蟹芝士通粉同埋皇帝蟹茶碗蒸。
至於好似我呢啲食肉獸就開心囉！因為有酥焗羊架、西班牙黑毛豬叉燒同埋慢燒美國頂級西冷牛扒嚟滿足「肉」望，呢個位仲有即刻煎起嘅香煎鴨肝。
除咗頭先嗰兩個中西湯之外，自助餐仲有羊肚菌花膠響螺燉雞湯任飲，呢個燉湯唔飲肯定係損失。
呢個自助飲品吧入面有任飲嘅精選紅酒、白酒、啤酒、汽水、橙汁、蘋果汁、咖啡同埋茶，好似我呢啲咁爛飲嘅酒鬼真係開心到爆呀。
好鬼肚餓啊攞咗一枱嘢食返嚟慢慢嘆！刺身真係好唔錯我就最鍾意赤貝同埋紅蝦，一個鮮爽一個甜糯正到無倫。
另外餐廳會送每人兩隻澳洲鮑魚刺身！鮑魚好鬼鮮甜仲勁有咬口，食完兩隻仲有啲唔係好夠喉㖭。
老婆大人錫到我燶攞咗一大碟Blue cheese俾我，藍芝士嗰朕味真係唔係人人接受到但係我就好鍾意，尤其是配啖杯白酒真係冇得輸㗎。生蠔好鬼肥脹卜卜咁勁鮮甜，兄弟們補身係時候喇。
平時食自助餐見到呢啲茶碗蒸一定唔會食！但係呢度嘅出品又真係幾正，蒸蛋好香滑面頭嘅皇帝蟹肉勁鮮甜，幾飽都要食一個先對得住自己個胃。
大家隻耳仔要留心聽到鐘聲記得出去攞呢個和風松葉蟹蓋炒飯，炒飯入面有勁邪惡嘅松葉蟹膏，仲有蟹肉、水牛芝士同埋三文魚籽，呢個炒飯真係非一般正食過你就知有幾好味。大家都知我係邪惡一族香煎鴨肝梗係唔會走得甩啦！煎嘅時候已經聞到好香食落去外面香脆入面軟綿綿，加埋一啲都唔蘇嗰朕油香真係正到痹呀。
平時我通常都係鍾意食牛肉多啲！但係呢度嘅焗羊架真係做得好出色，你睇吓幾咁粉嫩食落去仲好酥香，如果鍾意食羊肉嘅真係唔好錯過。
最後整嗰碗充滿蟹膏味熱辣辣嘅海鮮粥先至夠滿足呀。
呢度嘅甜品真係挑到我嘅食慾，所以都好攞咗好多返嚟同老婆大人一齊食，呢碟入面我就最鍾意個蛋撻仔啦。老婆大人平時好少會食麵包布甸！但係佢話呢個做得好好，我試咗一啖又真係幾好味喎。頭先睇中嘅抹茶戚風蛋糕食落去真係幾鬆軟！同埋甘甘香香綠茶味係好食嘅。嗰杯楊枝甘露布甸亦都好有驚喜！變咗固體嘅楊枝甘露味道更加香濃甜美感覺好得意，呢個自助餐做到12月14號，不過淨係逢星期五、六同埋公眾假期前夕先有得食。
張貼
