肆年八月米線專門店 (已搬遷) 新店位置

之前睇fb有介紹到哩間餐廳，我又住係附近，咁啱近期想食酸辣米線，所以就lunch帶埋囡囡同奶奶黎試下。其實哩間餐廳嘅位置都比較隱蔽，如果唔係住大圍嘅人士，都需要尋找一下，因為佢係大街見到嘅餐廳嘅後面，要係小路行入去的。由於我帶住我個囡，我都有啲擔心冇野啱佢食，好在佢是日午餐有個雞湯米線，我奶奶就叫左哩個是日午餐，而我就叫左手撕雞酸辣米線。我大概係一點十五分左右去到，撞正lunch time，所以都幾多人，加上佢得兩個人去招呼啲客，見佢都好忙下，我大概都等左差不多20-30分鐘先有得食。我碗酸辣米線，色水都唔錯，聞落去都好香，好吸引，食落都真係唔錯，辣度屬於少至中辣左右，都幾合我口味。至於雞湯米線，我奶奶就話鹹咗少少，但我個女都幾中意啲米線。總結：哩間都算係一間誠意小店，地方小小，食物都係有心思去煮的，不過就要有少少耐性等下。如果係中意食辣野，香口野的話，真係可以不妨一試。我建議就盡量唔好係正lunch time去，如果唔係，就要等起碼20分鐘。