越南Fûhn (已結業)

今日同個同事中午時間過咗嚟九龍灣啟業呢邊搵食，驟眼見到街市入面有唔少食肆，最後搵咗呢間越式餐廳Fuhn Express開飯。諗起對上一次過嚟啟業呢邊，已經有一段時間，估唔到一個舊式屋邨可以翻新到個街市咁靚、咁光猛。事後我再問返住呢頭嘅朋友先知，原來街市已經翻新咗好幾年時間，哈哈。我叫咗碗生牛肉河粉套餐($40)，個碗夠晒大，質素仲要相當唔錯。我平時都幾鍾意食越式河粉，食生牛肉河我最睇重個湯底，因為湯底質素優劣絕對會影響成個用餐體驗。呢到唔係用上一般貨色嘅味精水，呢煲湯應該準備咗唔少時間。湯底亦夠晒熱，剛剛好可以灼熱幾片生牛肉。同事就嗌咗個香茅豬扒檬粉($45)。豬扒Size大家有眼睇，好大塊。豬扒本身煎得好香口，面頭仲配有唔少爆到好香嘅蔥粒、炸蒜，成個體驗夠晒滿足!小食方面，我地叫咗份扎肉米紙卷($35)。每次去越南餐廳就好想試米紙卷。呢到嘅米紙卷做得幾足料，包到實一實，材料亦好豐富，入口層次感十足，非常清爽，夏天食呢味一流！另外，我地仲叫咗份自家製蝦餅($58)。未食之前，我覺得呢個蝦餅價錢有少少偏貴(對比起店內其他食物選擇)，但係食完之後就發覺係物有所值，大家可以睇到張圖有幾多蝦肉