五洲餐廳 (已結業)

Tea Buffet，酒店頂層，法式餐廳格局（但舊咗D），有馬蹄形梳化，亦有對住啟德機場嘅窗口位，入口處有報紙供應。沙律菜及沙律有4款，又有生果盤；壽司有2款，三文治又有2款；熱盤就凈係得8款，不過甜品亦有成5款；食物種類、款式真係唔算多，質素亦普普通通，叫做樣樣有DD，不過其中有幾樣嘢又估唔到幾好，好似泰式牛肉沙律，鹹鹹酸酸幾特別；香草汁燒羊架，少少羶，肉質都算嫩；焗雞翼又幾惹味；甜品有個士多啤梨慕絲蛋糕算做得唔錯。依度人客唔多，招呼OK，坐得舒舒服服，對住舊機場（雖然空空如也，得塊爛地，只係見到遠遠嘅九龍灣MegaBox），嘆吓報紙，食個下午茶，回憶吓啟德年代，想番吓飛機升升降降，又幻想吓啟德將來嘅大變化，真係唔志在食，食物都變得其次，反正哩度D食物又唔係好正，收個$88位，仲要有折添，忙裡偷閒，唔一定樣樣都要食好著好，抖抖氣，輕鬆吓咪幾好！