真珠Face (已結業)

是日天氣繼續熱辣辣，經過心諗買杯野飲涼快下都好，眼見登打士街依然一堆堆人群.... 真係見到都驚，想行步路都難。咁多間唯獨呢間未試過，所以想試下，眼見佢門口有一大堆人，心諗如果要排好耐就放棄，點知行近原來成大班人都係等緊野飲，埋去俾錢竟然排都唔駛排..... =o=當然叫返最穩陣的珍珠奶茶，店員收我$ 10，其後再看原來可以叫細杯的，早知叫細杯D啦，廢事浪費嘛~ 叫了少甜少冰，俾完錢就乖乖的在旁邊等啦。俾錢就快，不過等野飲都要等幾耐下，好彩佢知客人熱，擺左個電風扇係側邊，咁都等得無咁辛苦。而家只有果味梳打做緊買一送一，不過我見個個買親既都無人買梳打的，哈哈~ 等十幾個NUMBER大概等左 10 分鐘到啦，就有得飲啦。叫左佢少冰，不過感覺都唔係太少，仲係幾多下。第一啖飲落去真係唔錯，絕對唔會得個甜字，甜度非常適中。茶味亦濃，最怕淡如白開水好似飲糖水咁，所以是幾好的。珍珠細細粒，夠煙靱而且幾多下... 去到最後仲有勁多珍珠。不過飲到一半時杯野飲已經開始變得幾淡下，可能天氣酷熱 d 冰都溶得快d，所以下次都係叫細杯快快手飲哂去最好。十蚊黎講都算幾抵飲，唔駛排隊都可以一飲的。