牛棚 (已結業)

行過見到下面個招牌，睇落好好味咁，見有啲餓就試下佢啦！環境格局企理光猛。既然係被招牌吸引，梗係要叫牛三寶啦，筆者食麵，友人食河。牛腩一舊腍一舊鞋，估計加6蚊轉坑腩會正啲。牛筋又係一舊腍一舊爽喎，咁搞笑既。牛肚就腍腍軟咁。三寶整體算ok啦！ 呀，招牌明明話中藥配方，筆者就真係食唔出用左邊啲中藥喇，都好既，勁重中藥味既話(好似台灣牛肉麵一類) 並非筆者杯茶。湯底食落唔太咸。仲有辣油都係潮州麵食重要一環，呢到既辣油整得幾香，不過無乜"渣", 成罐幾乎都係油，撈得幾鬼辛苦先得碎碎咁多。。。另外口痕要左碟魚皮。依家似乎好多麵舖都係入一包包預先包裝既貨，呢到似乎都係一樣既貨源，味道正常。份量好多，但好碎味道不過不失，唔食無走寶，食下又無妨。