川上龍 (已結業)

天氣熱辣辣，本身想去食涼浸浸嘅壽司，但可能因為真係太鐘意食辣，所以最尾都係嚟咗食四川嘢...［川汁皮蛋，$38］皮蛋加粉皮，呢個配搭幾特別，個汁都調得幾辣幾鮮味，但最失敗就係個粉皮太腍，夾嘅時候好易斷開［口水雞，$78］我哋呢碟嘅雞個部位比較多骨，冇得啖啖肉。而個醬似係現成嘅辣椒醬，偏咸，一啲都唔麻，所以味道有啲唔啱，失望［水煮牛肉，$118］牛肉份量算多，底亦有紅薯粉，所以都幾飽肚。辣度方面，我哋揀咗正常辣度，但食食吓覺得一啲都唔辣，需要叫侍應拎返入廚房加辣，咁先至辣返少少。不過佢只有好少好少麻，鍾意食麻嘅人可以叫佢加麻［鱔糊兩面黃，$68］鱔糊份量好多，而且一啲都唔腥，但有少少偏甜。而個兩面黃就好脆，甚至擺咗半個鐘後都依然係脆嘅。