喜記避風塘炒辣蟹 (已結業)

某夜，途經洛克道近紐約戲院段，猛然發覺多咗好多橋底辣蟹鋪，老婆突然話好想食，於是走入喜記，一來近，二來門口有啲雜誌介紹，三來見幾多客喺度食緊，要等位，應該唔衰得去邊。錯晒!蟹，一千零一種整法，我話兩個人食，侍應拿樣辦出來，叫價$450，其實非常乸脷，不過一心同老婆嚟食蟹，又見到周圍貼滿晒避風塘辣蟹王啲剪報，無理由唔試試。十足十玩大話骰，就係咁俾佢大到! 隻蟹嚟到，大就大嘞，但係肉就無乜，一味係墊底啲乾蔥。少都算嘞，如果好食嘅話。可惜，味蕾只感到好普通生抽炒餸後嘅咸味，同埋啲乾荵嘅苦澀味。雖然叫“小辣 ”，但係我已經好興！跟手嚟嗰碟炒蜆，分分鐘你屋企樓下家庭式運作嘅小店會好食（同抵食）過佢多多聲。等咗好耐都冇嚟嘅癩尿蝦，我叫佢唔使嚟。你哋都唔使嚟。(仲有個女經理啲態度幾愛理不理）兩碟嘢加支啤，$650.