和牛燒肉一郎 (新都城中心二期) (已結業)

🧘🏻是日，小編難得地做完運動。及後想補充大量優質蛋白質，所以拉埋妹妹一齊去「和牛燒肉一郎」希望豐富肉食，修復填充修損肌肉細胞（貪食模式理由合理化）。🍴餐廳清晰劃為四個區域，包括：甜品、沙律、飲品，以及爆谷區。飲品區有誠意！除咗平日飲到嘅汽水，餐廳仲提供八款自家製水果飲品，正好解肉膩。🍨甜品區方面，有五款小品及多款日本或韓國直送雪糕供選擇。小編及妹妹都覺得甜品幾高質，妹妹鐘意玉林蘋果木糠布甸有新意，小編就覺得燉蛋香滑重奶香最吸引。🍖做完運動想食少啲油脂，所以揀咗B餐「美國特選和牛」餐廳經理表示牛肉未經加工，基本上係原汁原味，希望俾食客享受到牛肉本身嘅香味。但係精選牛肉已經有二十五款，牛肉刺身三款，日本豚肉六款，雞肉四款，海鮮八款，野菜十款，其他食品例如熟食及料理三十八款 。食物種類實在太豐富，選擇太多，小編嘅黑洞胃都冇辦法一次試晒所有食物。🥩牛肉方面，小編覺得牛肋肉以及牛肉角切嘅肉味最香濃。正所謂好嘅食材只需要輕量調味帶出鮮味，燒好嘅牛肉只需要輕量嘅海鹽點綴，提鮮肉香。🥗減緊肥嘅朋友，小編建議肉食時搭配沙律或生菜包享用。椰菜花及蕃茄仔清新，小編最愛。另外亦可以搭配泡菜，瞬間變咗韓式燒肉。