神輿日本料理 (已結業)

放題周街都係，M佬今次就帶我去到位於旺角嘅神輿日本料理。一入門口我已好鍾意，除咗好有日本既感覺之外，最鍾意係空間感十足，唔似一般擠迫感十足嘅放題店。坐低後就更驚喜，本點菜紙仲厚過一本牛津字典，選擇都算多，包括刺身、卷物、手卷、壽司、一品料理、炸物、天婦羅、鍋物、主食、小食、爐端燒同埋甜品，即刻落order！刺身 ＆ 壽司刺身選擇有三文魚、油甘魚、八爪魚、松葉蟹棒、帶子、吞拿魚、北寄貝、象拔蚌、希靈魚、馬刀貝同甜蝦。試咗幾款刺身都夠新鮮，當中最鍾意係厚切嘅三文魚，油脂分佈平均，鮮味十足，好有口感；而油甘魚都好肥美，油脂豐富；仲有肉質爽脆嘅希靈魚同口感十足嘅帶子同象拔蚌。至於壽司即叫即整，所以芥辣八爪魚軍艦壽司嘅紫菜仍然係脆口；另外一個推介係左口魚邊，接近入口即熔。冷盤小食各款嘅冷盤小食都係我哋最愛，當然唔少得中華沙律、味付螺肉、芝麻八爪魚，清新開胃。芝士焗虎蝦一嚟到已經香噴噴！芝士味濃，好creamy，好滿足。芝士焗蠔焗蠔新鮮唔腥，一樣好creamy。爐端燒揀咗日本小番薯、鹽燒雞腎串同一口牛。燒菠蘿香甜多汁，絕對係必食之選！汁燒一口牛肉質鮮嫩，甘香肥美，煮到入晒味。