賣相已經贏咗！紅噹噹嘅韓式辣醬炒住一大堆食材，面頭鋪滿青口、大蝦、魷魚，仲有啲魚片同蜆，睇落勁豐富！年糕唔係得幾條嗰種，係多到好似掘極都有咁，每條都肥嘟嘟，煮得啱啱好，煙煙韌韌又入味。
一啖食落去，個醬汁香辣惹味，唔會死鹹，帶少少甜味，好掛汁！海鮮方面都幾新鮮，大蝦爽口彈牙，青口同蜆都無沙，魷魚圈咬落去唔會韌，整體配搭好夾。最正係年糕索晒啲海鮮精華同辣醬，食到停唔到口！
雖然話係「炒年糕」，但其實佢個汁嘅濃稠度似半湯半炒，撈埋啲配料一齊食，真係超滿足。如果鍾意食辣嘅，可以叫中辣，更加過癮！
Outdark呢鍋海鮮炒年糕，抵食、大份、味道正，同朋友開心share就最啱！
