圓山台灣料理 (已結業)

今日約咗阿姨放工食飯，之前聽世伯講經常去呢間餐廳，所以就一早打去訂咗位。餐廳標榜台灣料理，打開餐牌，其實也有很多其他菜式很吸引，不過兩個女人仔， 叫太多都食唔晒，所以就要左個鹽酥雞，台式冰鎮骨，炒A菜，秘製糖番薯，少不得要肉操飯。呢度嘅侍應服務態度好好，地方又乾淨光猛，好適合傾計，首先我哋一嚟就開咗茶，當我地食甜品嘅時候又會主動幫我地換過晒啲碟。鹽酥雞一上枱，最頂個粒特登切開一半，我估佢係比你知道入邊熟咗，咬入去好滑，出邊又波波趣，唔錯。台式冰鎮骨，出邊晶凝通透，咬入去亦都好滑，而且好入味。肉操飯，初頭見到面得咁少配料，心想大事不妙，但係我將佢徹底攪拌後，其實整碗飯都分配得剛剛好。啖啖都有肉操及油脂包住。炒a菜，好爽口，好似返咗台灣咁，如果諗唔到食咩菜，炒A菜係最好嘅選擇。我最鍾意嘅係秘製糖番薯，成舊番薯好甜，不是加工嘅甜味，而且好細膩嘅口感，唔會有渣。以為會飽肚食唔落，結果我哋清晒。隔離枱有好多人開酒飲，我估佢哋係常客。下次有機會，再叫世伯同阿姨一齊上去食。