叫左個罈仔五花肉揀左配炒飯，食食下追加埋燒芝士同年糕，再叫左韓式芝士蒸蛋！見到濟洲爺爺勁得意所以都叫埋！飲品嗌左漢拿峰梳打，同埋一個漢拿峰金桔雞尾燒酒
一嗌完野食就比左個格仔盒我地，係一啲前菜，有傳統韓式辣醬用黎點五花肉，有個好香芝麻油既胡椒醬，有一格係生牛肉，一格係辣生魷魚，仲有一格有濟洲桔既沙律！
五花肉配炒飯（$376）
⭐️⭐️⭐️⭐️⭐️
原來450g都唔少野！有專人Oppa幫我地燒埋，燒肉既石板好似岩石板咁，大細火完全唔使擔心，燒肉之餘仲會燒埋泡菜，杏鮑菇，蒜頭一齊燒！Oppa將五花肉放上，蔬菜放下面，五花肉的燒出來既油流到蔬菜到！精華呀！佢地唔係典型既韓燒用生菜包，但都跟左粉紅鹽，Wasabi同埋芥末，仲加埋前菜兩格既醬可以用黎點！最得意係佢地會燒埋個濟洲桔！我地試哂啲醬同粉紅鹽，仲試埋唧咗啲桔既汁落啲肉到食！
我地覺得粉紅鹽最夾，當然傳統醬都唔會輸，但仲有個好重芝麻油既胡椒醬係好有驚喜架！燒緊肉既Oppa極力大推粉紅鹽！認證！食完啲肉，當然唔少得趁岩石板上有五花肉既油，轟埋個炒飯落去！個炒飯係泡菜炒飯，但我地覺得唔夠辣，加左啲佢本身燒緊既泡菜！推介大家留番啲泡菜加落去！
食食下我地追加左芝士同年糕（$40）
⭐️⭐️⭐️⭐️⭐️
將年糕包住啲芝士食！原來係咁過癮！韓國年糕食得多，咁樣好似日式薄薄一片好似牛角咁都真係未食過，但佢唔似日式咁會發脹，佢會軟林林，再包埋個芝士，熱辣辣，好煙靭！
韓式芝士蒸蛋（$68）
⭐️⭐️⭐️⭐️⭐️
個拉絲真係不得了！而且蒸蛋既湯超級入味！雞蛋打出好多泡泡所以空氣感十足，同時啖啖芝士，錦錦既蛋！想再食多一個！！！呢個五分滿分我地比十分！
Jeju Yeah Yeah($70)
⭐️⭐️⭐️⭐️
究竟佢係蛋糕，布丁定係慕絲呢？我地都唔肯定，但佢滿滿既黑芝麻味，入面仲有濟洲桔！特別同時好夾，再加埋側邊既雪糕，淋左桔既醬！成件事好夾，食完韓燒加一個咁樣既甜品，好完整既感覺！
漢拿峰金桔雞尾燒酒（$48）
⭐️⭐️⭐️⭐️
見到濟洲桔咁出名，我地叫左兩杯都係同漢拿峰桔有關既飲咗，呢個highball，佢唔講有燒酒真係飲唔出，勁易入口，仲有埋熱情果咁，呢個用黎呃女仔真係好好！超易入口，食住韓燒好快飲完！
漢拿峰梳打（$48）
⭐️⭐️⭐️⭐️⭐️
同樣都係漢拿峰，但無酒精既選擇，韓燒就係要配呢啲飲品，解膩同時有氣！唔酸，攪勻佢黎飲，絕呀！
整體黎講，服務有埋Oppa幫手燒，絕對一流，韓國一樣既體驗，又乾淨，無油林林既枱同地，最令我地驚訝既係個抽氣系統，我地食完都唔會成身油煙味，袋可以放入櫈入面。走時完成唔似食完韓燒！大讚！
