豚道樂 (百合苑商場) (已結業)

本身男友想試豚道樂荃灣分店好耐，但一直都未試到。終於揾到日去黃埔，順便試埋豚道樂拉麵啦👏🏿。雖然係星期六，但鋪頭都係得幾枱客，所以唔洗等位😆。坐低之後，我地點左一碗原味同一碗辣味湯底拉麵，再加多客咖哩蜂蜜雞翼。兩碗拉麵都好快上枱，原味拉麵嘅湯底同唐辛醬真係同一蘭拉麵幾似😍，再加上我點左幼麵，啲麵又唔會一舊舊整唔散，所以相似度都有80%🤣。少少失分位係叉燒嘅竹炭味太重，個人唔鐘意呢種味，所以覺得同個麵好唔夾。另外，唐辛醬份量可以再多啲，就會更加帶出到拉麵嘅香濃味。至於辣味拉麵呢，辣味唔會太搶，同幼麵同湯底都好夾。另外會有一種令人食到唔想停嘅感覺，因為個辣味夠過癮😋👍🏻不過叉燒都係竹炭味太重😕，扣左分。雞翼就最後先上，一客4隻，得面頭嗰隻比較肥大多肉😂。原本係想試芝麻雞翼，好可惜店員話賣曬，所以最後先嗌蜂蜜咖哩雞翼。雞翼入口熱辣辣，應該都係即叫即整。不過味道方面就真係普普通通，冇乜特別。蜂蜜嘅甜味太出，真係一啲咖哩味都食唔到，直接改名做蜂蜜雞翼可能仲好😂。整體黎講，拉麵真係幾出色，不過叉燒就可以整得再好食啲，同埋其實唔計個小食都可以俾，有機會一定去荃灣分店試下🤤。