吉壽日本料理 (已結業)

差不多近半年無食過日式放題，趁住呀媽正日生日，帶呀媽試下日式放題。呢間鋪頭非常就腳，旺角E1出口，一出門口轉右，吉野家隔離就有電梯上，直上5樓，全層都係吉壽放題，地點無得彈。呢間放題嘅野食質素幾好，刺身魚生呢啲基本野係做得幾好，另外特別要讚一讚呢度嘅熟食，因為呀媽好少食日式野，刺身魚生呢啲佢都係食少少唔太多，所以都有叫啲熟食比呀媽打個底。呢度嘅比目魚好食，烤到啲魚皮脆，魚肉甜。壽喜燒牛肉鍋都係必點之選，另外叫咗一啲炙三文魚鰻魚壽司比呀媽。另外叫咗啲刺身 池魚三文魚吞拿魚都係要叫。另外，烤帶子，虎蝦刺身呢啲都係必食，仲要係食完一輪會再叫。另外每張檯都係一個人幫手落order執檯，仲要好好服務，大讚。咁忙嘅食肆都有好服務。