圓山台灣料理 (已結業)

今日約朋友嚟食台灣菜，圓山歷史好耐，有好正宗的感覺，以前大廚係台灣人，而家我就唔知，只不過都冇乜所謂，好食就得啦！估唔到送嘅青瓜都好好食，人未齊我又肚餓，幾乎比我食晒。我好鍾意食台式皮蛋豆腐，所以一定點，肉鬆夠乾身好爽，豆腐都好靚呀！鍾意佢上面有啲結結地嘅汁，皮蛋流心，真係好食㗎，下次來都要再點。今晚呢個肥仔麻油雞湯都好得，啲湯黃色嘅，好濃郁，好好味，雞都唔嚡好食。金門欖角骨我都好鍾意，最鍾意就係有啲鹹鹹地嘅欖角，吮吓骨，有一陣鹹香味，好食，滋味。樟茶鴨一份都幾多，仲配四個包，金黃色鴨皮夠脆，鴨肉連骨幾嫩，唔乾，只係味道有啲淡。極品流沙包少少流心，好食呀！服務環境等等，整體唔錯，滿意！