古早味台灣原味 (已結業)

想起有一段時間冇去台灣，冇食到台灣食品，突然間很懷念台灣小吃，今日辦完事行過京都廣場剛好見到上面有一間台灣食店，就決定上去。環境舒服，食正餐地方，可以叫餸食飯，但今晚我們只有兩個人，還是以小吃為主的好。豬軟骨滷肉飯味道濃郁，幼粒的滷肉加埋汁加埋飯，食得固然滋味，仲有豬軟骨，增加口感就更加理想。未食過炸紅槽肉，貌似炸五花腩薄切，相當香口肥美，有新鮮感。宜蘭蔥餡餅一盒有四個，$28唔貴，即點即炸，熱騰騰，雖然不及照片漂亮但頗為好吃。最後配款菜，辣椒炒椰菜勝在可以均衡飲食，椰菜都幾多汁，辣椒冇過多，辣度適中。