古早味台灣原味 (已結業)

呢間位於銅鑼灣樓上鋪嘅台灣菜餐廳，位置十分方便，一出地鐵站再過條馬路就到。店鋪幾寬敞，裝飾都幾有格調。雖然係樓上鋪，午市至下午茶時段都好多食客。呢次星期日嚟食雖然冇套餐優惠，但單叫食物價錢都好相宜，如果星期一至五嚟食就更加抵食啦。首先嗌咗個麻醬台式拌麵，個麵好大份，拌菜都好足料，台式麻醬係另上嘅，個醬咸香再加少少酸味，好開胃👍🏻個碗下麵有啲冰再有個網隔住啲麵，所以一路食都可以keep住凍，啱哂呢幾日嘅熱天氣！另外叫咗個嘉義雞肉飯，個飯上面鋪滿哂手撕雞，再淋上啲惹味嘅醬汁，啖啖肉食得好滿足！最後加餸食咗鹽酥雞，28蚊大大份，個雞脆口得嚟又鹹度適中，唔會好似一般啲鹽酥雞咁重口味。呢間餐廳性格比高，係比較啱香港人口味嘅台灣菜，好味得嚟唔會有一貫台灣菜嘅重口味！