一品活蝦 (已結業)

香港比較少專食蝦嘅舖頭，之前去台灣嘅時候就試過幾間，封咗關咁耐，一直都好懷念嗰種台式風味。最近有朋友介紹，北角原來有一間台式嘅蝦料理店，咁就一於專程去試吓啦。一去到，見到佢嘅裝修好靚。有少少日式居酒屋嘅風味，但又有少少台灣嘅復古感覺，都幾適合影相。佢嘅飲品係自助形式自己拎，最後先一次過計錢。呢個方法令我諗翻起之前喺九份啲餐廳食嘢，都係咁計㗎，唔知呢間餐廳嘅老闆係唔係真係台灣人呢？我就叫咗個古早味鹹豬肉，本身有少少怕佢會好肥，但係好彩佢嘅肥瘦適中，唔會太硬又唔會太肥膩。而且佢嘅調味都啱啱好，食落覺得應該好送飯。另外我哋仲叫咗個細嘅胡椒蝦，一上枱已經聞到好香。佢嘅蝦都係比較大隻，而且食落好彈牙，感覺好新鮮。另外仲叫咗個魚湯麵線，佢嘅魚湯好清甜，我諗應該真係用魚黎煲既。雖然好夠味，但係食完唔會口渴，感覺完全冇味精，最後連啲湯都飲晒呀。呢間餐廳又特別又好食，下次都會再嚟試吓其他嘢呀。