夫妻沸片-台式麻辣火鍋 (已結業)

🔸精選肉類二人套餐 $488🔸美人鍋 +$38🔸竹蔗茅根水 $70-疫情緩和返之後最想就係去烚下烚下，今晚就同朋友試試呢間台式火鍋！裝修方面用咗好多燈籠，有台灣九份嘅味道，仲有兩邊嘅卡位，座位安排都幾寬敞。二人套餐可以揀一個大鍋或者兩個單人鍋，衛生起見都係揀返兩個鍋，仲可以試多款唔同嘅湯底𠻹！今次揀咗夫妻鍋（台式麻辣湯）同埋美人鍋（花膠雞湯）。前者好香口，少少辣，仲有花椒八角等嘅香料味，仲有幾舊鴨血同好入味嘅豆腐；而後者就非常滋補養顏，湯底配埋大大舊花膠同雞件，足料有誠意。仲要讚一讚，烚到咁上下叫店員加湯，唔係加滾水，而真係加返你食緊嘅湯，好加分！火鍋配菜方面，精選肉類拼盤有美國肥牛、美國穀飼牛、加拿大牛舌、西班牙黑毛豬。野菜盤有金菇、花菇、蓮藕、冬瓜、蘿蔔、南瓜、唐生菜、皇帝菜、芋頭等等。仲有貢丸、牛丸、水餃、雲吞，仲有一份紅薯粉。配菜款式幾多，但份量唔多，啱晒我哋呢啲眼闊肚窄嘅女仔啦！