101手工涮涮鍋 (已結業)

同舊同學聚舊，同學揀左呢一間，話有朋友推薦。地點又方便，尖沙咀大家地容易去。我地就揀左極上吃到飽套餐，套餐入面有分前菜，主菜（姐係個火鍋），海鮮拼盤，肉類，火鍋拼盤，響鈴魚皮，火鍋配料同飲品甜品。前菜同火鍋配料都係任食既，可以食到你飽。火鍋方面我地揀左冬瓜海鮮鍋，佢入有有大半舊冬瓜係中間，圈住d蜆。湯底好鮮甜，冬瓜味同蜆味好夾，再加少少胡椒味。蜆肉夠新鮮，冬瓜非常入味，不過好鬼熱食要小心d。肉類我地叫左牛頸脊，依家打邊爐興食呢個位，脂肪唔會太多之餘肉又嫩，淥一淥就食得，牛味濃郁。101手工火鍋拼盤，當中最過癮係個墨魚汁鳥結糖，有d似墨魚滑但係更彈牙。響鈴同魚皮都係即炸，好脆夠新鮮。火鍋配料方面，雪場蟹腳同台灣香腸都好正，啖啖肉。