大瀛喜日本料理 (已結業)

好彩揀咗5:30個時段去食，唔使點樣等位就入到去，上菜嘅時間仲要好快添！一入門口就見到好多款飲品選擇，而且部份係酒精飲品，啱晒啲朋友尼聚會，飲少少酒，傾吓計。而且佢仲提供左熱飲選擇，好細心！食放題當然唔少得刺身拼盤，三文魚好新鮮，仲有我最鍾意食嘅油金魚！！鍾意食蝦嘅朋友可以選擇甜蝦、虎蝦等等，加埋夠辣嘅wasabi，真係唔錯唔錯！至於壽司方面，火灸壽司就最出色。火灸蟹棒壽司、鹽燒三文魚壽司係真係好好食！蟹棒上面加上少少沙律醬、三文魚上面加上啲蔥花，真係非常好嘅配搭！除咗火炙壽司之外，鮮帶子壽司都非常好食，帶子好大粒，而且好鮮味，絕對係回本嘅選擇！天婦羅方面，大蝦當然唔少得啦！炸出嚟脆扑扑，非常鬆軟，唔會剩係得啲粉，非常足料㗎！平時放題唔係間間有得食海膽，不過今次有得食海膽手卷，鍾意食海膽嘅朋友一定唔可以錯過啊！甜品包羅萬有，鍾意食蛋糕嘅可以試吓雲石芝士蛋糕，雪米糍方面有幾種味道俾你揀，雪糕雪條更加唔使講啦！特別嘅係佢呢度有忌廉泡芙，唔太甜，幾好食㗎！