牛匠石燒 (已結業)

唔知道食乜，想食和牛，咁encore哩間一直有幫襯開嘅鋪頭。桂妃美顏茶（紅棗桂圓），桂圓味好香，伴有少少紅棗味，唔會好甜，飲落好健康。芝士奶蓋四季春，茶底品質唔錯，唔會有澀味。芝士奶蓋比得好豪，同四季春撈埋一齊，好香濃嘅奶味。前菜芝麻牛蒡，牛蒡好脆口，少少酸甜，作為前菜唔錯。生菜蒜片，食燒烤必叫，蒜片分量好大，搭配埋牛肉一齊食，好好味。澳洲M9和牛肩胛小排，和牛雪花分明，睇到都開心。哩份分量都幾大下，牛肉唔洗燒好耐，已經可以食。和牛入口即化，加埋蒜片生菜更加好味。鹽蔥薄切牛舌，牛舌唔算好薄切，厚度啱啱好，食落牛味好重同埋勁彈牙，搭配埋蔥絲好好味。日式海鮮煎餅，好似章魚燒做法，搭配埋大量蛋黃醬同埋柴魚花。配料好豐富，食到D蝦同魷魚，煎餅煎得好脆，配埋醬汁更加惹味。湯烏冬，我嘅最愛，烏冬彈牙爽口，湯底清甜好味，同日本食嘅冇分別。哩間鋪頭已經食過好多次，次次都keep得好好，勁開心！