不過除左創意卷物，呢度都有供應刺身，壽司，沙律，小食，燒物，天婦羅，飯等。
創意卷物就必點架啦。另外叫左一份沙律，兩款燒物同一個鍋，試下新野先。
麵豉湯
一坐低就每人有一碗麵豉湯，湯夠濃夠咸，入面有腐皮仔，昆布同蔥花。
龍卷風沙律 $68
龍卷風沙律成座山咁，主要係新鮮生菜塊，加入脆脆海藻，蟹柳絲，蟹籽，甜蛋碎，撈埋沙律醬同佢地既招牌鰻魚汁，仲有唔少脆片碎增強口感。味道幾濃，主要係蟹柳同海藻味，仲有少少辣。
金龍卷 & 蜘蛛
叫左兩款創意卷物，同一碟一齊上，擺盆精緻。
蜘蛛 $85
蜘蛛原來係紫菜卷包住炸軟殼蟹，蟹柳，牛油果同青瓜絲。一客五件，三件身兩件蜘蛛尾，賣相唔錯，特別係條尾。炸軟殼蟹仲好香脆，加埋青瓜同牛油果食可減膩。
金龍卷 $88
金龍卷一客八件，分開兩條短金龍放係碟既兩邊，原來係卷包住炸蝦加d cream cheese，上面舖上一塊厚厚地既三文魚刺身，再加少少沙律醬。炸蝦皮好脆，我好鍾意cream cheese既清新味同creamy質感，加埋新鮮肥美既三文魚刺身，多重口感味道。
網燒牛舌 $48
網燒牛舌一客八塊，牛舌都幾厚身，質感爽脆，好有咬口。本身調味足，加埋另上既麻油，好香。
雞翼串燒 $48
每串兩隻雞翼，共兩串，開左邊方便食，雞翼唔算大件。雖然放左一陣先食，個皮仲好脆，鹽燒關係所以係乾身。
三文魚頭湯鍋 $88
三文魚頭湯鍋個鍋好大，有半邊三文魚頭，好多甜嫩娃娃菜，幾多豆腐，京䓤粒同紅蘿蔔。三文魚頭d肉居然唔算韌，都算嫩滑。個湯胡椒濃，少少辣，飲完個身暖笠笠。蔬菜吸左個湯超甜，好健康既鍋物，我地飲個鍋底朝天。
食完超飽，今餐d野食都唔錯。除左創意卷物，呢度都有好多其他野食，下次可以再黎。座位都ok，有大膠板同鄰座隔開。上菜超快，除左個鍋等左陣，其他快到食唔切。
