慶記 (已結業)

識搵食嘅朋友仔都知道大角咀呢個地方其實都係美食天堂，有好多鋪頭都係臥虎藏龍。今次黎到呢間叫慶記嘅中菜餐廳，係餐牌見到又有小籠包，又有啲辣辣地嘅川菜食，食得幾過癮。我同朋友分別叫左紅燒豬軟骨撈麵同埋口水雞絲冷麵，呢兩隻麵都各有特色，豬軟骨份量好足，浸住豬軟骨個個汁同個麵都好夾，而口水雞個碗又另一個風格，個口水雞汁係小辣帶酸，我覺得佢有加到黑醋因為隱約feel到個隻味，但配埋青瓜絲加個麵係好夾，食完好清涼，好容易一啖接一啖咁狂食，值得推薦。食咁多野當然要配個茶黎飲，叫個茶都有茶壺裝住，都好抵玩喎。紅油抄手黎講佢呢個菜肉雲吞本身已經皮薄餡靚，極好食，食個陣係咁將個雲吞碌下碌下，務求上多啲汁再配埋椒碎咁食，真係不得了。口水醉雞卷自問真係第一次食，但係出奇地好食。雖然個汁同頭先嗌個個撈麵汁差唔多，但係份量夠而且味道好。生煎胡椒包都過得去架，皮脆肉嫩，如果鍾意食香口野，呢個岩哂你。正常嘅小籠包同埋蟹肉小籠包我都有叫到，裡面啲湯汁好正，個外皮皮薄但好成功保護，無咁易夾爛，兩個都叫得過架。呢間店性價比高，野食唔係度度有，我個人會推介大家試下個口水雞絲撈麵。