達順辣蟹火鍋 (已易手) 新餐廳

繼琴日個豬骨鍋，呢餐已經係呢個星期第三次打邊爐😅 原來同一類人，真係會識返同一類朋友🤪每次約食飯，不論係30度定12度，我班飯腳都會話想打邊爐🥢 不過今次就特別啲，我哋喺銅鑼灣搵到間出名平靚正嘅粥底火煱「達順辣蟹火鍋」。我哋約咗喺銅鑼灣廣場集合，沿住鵝頸橋行過灣仔方向，5分鐘就到。餐廳以中式枱調，卡位裝修到獨立庭院咁，環境都幾舒服。我哋今次特登黎就係試吓佢嘅粥底火鍋套餐，餐廳用粥水代替濃湯底，味覺比較清新，我哋叫個4個套餐，包括有2隻肉蟹、5款海鮮、8款火煱配料，當然唔少得粥底+落粥嘅配菜啦！我哋先將肉蟹放入粥水裡面煮，12分鐘左右剛剛熟，肉質鮮甜不在話下，仲啖啖肉... 唔錯唔錯。海鮮方便我哋揀咗蝦、鮑魚、多寶魚、花甲，樣樣都好新鮮🤩 而其他火鍋配料都唔差呀，魚片頭更係爽口彈牙，一定要試！原來食完晒所有配料之後，服務員仲會幫我地加一啲米飯入煱裡面，同頭先一鍋海鮮粥水合併，真係正到脾啊呀👍🏻 而且價錢仲要係198一位冇加一，如果唔係我哋為食加咗份桶蠔同酸梅湯，真係$200都有得找... 抵到呢！