漁獲浜燒 (已結業)

我同老友都好鍾意食海鮮，今日就揀咗去銅鑼灣聚餐。 魚獲浜燒就喺SOGO附近，係一間以新鮮海鮮為主打嘅餐廳，提供多種海鮮料理，即撈即燒即嚐~ 日式裝潢，以木系傢具佈置。首先叫咗個招牌菜「活龍蝦浜燒」，店員攞隻龍蝦俾我地照吓相先，龍蝦好活躍，證明真係好新鮮。 劏洗之後就將隻龍蝦慢慢燒烤，上面仲搽咗一層厚厚嘅蟹膏，雙種鮮味融合，龍蝦肉質鮮嫩，蟹膏香滑濃郁，超正！另外點咗一個【漁獲浜燒 二人前】。 先以簡單嘅芝麻鹽醬椰菜作為一道清爽開胃菜。五款中選兩款材料做日式TACO手卷，我哋揀咗火炙海鰻同火炙左口魚，墨西哥TACO食得多，今次日式用咗紫菜做外層，再以天婦羅方式製作。外皮酥脆，內裡鮮嫩，鍾意火炙左口魚多啲，油脂特別豐富。主角當然係海鮮，珍寶大蝦、鮑魚、貴妃蚌、蠔、蟶子皇，全部燒烤得恰到好處，店員真係好專業，完全保持咗海鮮嘅鮮甜同嫩滑。主食係熱辣辣嘅牛小排石鍋飯，嫩滑牛小排加上雞蛋蔥花提味，石鍋底部有一層金黃酥脆嘅飯焦，讚！飯後甜品可以選雪葩或窩夫，上枱時有點驚喜，檸檬雪葩有真檸檬外殼包裏，做型別緻，冰涼清新。 窩夫係日本窩夫，用料十足。精緻美味嘅一餐！