養心殿台式養生鍋 (已結業)

聽朋友講養心殿好好味，上網睇到7點半前用現金埋單就會有半價優惠。咁抵🤔一於黎會下佢！由於係平日下午茶時間，去到只有一枱客係度。環境唔錯，枱與枱之間都好闊落。唯獨係張‘鄧’真係唔係咁好坐😂鍋底叫左酸菜白肉拼麻辣鍋。由於唔太鍾意食鴨血既關係，免費追加揀左酸菜白肉。另外叫左碟大既手切肥牛同丸拼盤。酸菜白肉鍋底本身就有跟酸菜白肉同寬粉，份量仲要都唔小，大約分到兩碗仔寬粉。個湯底真係好正🤣煲到最後真係想倒個米線落去。可惜無米線叫。至於麻辣湯底本身就跟左4條鴨血同4舊凍豆腐。我本身係食唔落豬紅鴨血之類既野，已經唔係唔鍾意，係食唔落😂但係呢度既鴨血係完全無果陣腥臭味，我竟然食到😋凍豆腐吸晒d麻辣湯底，勁正！丸類我覺得最好食既係梅菜豬肉丸！下次會單點佢。其次係芝心牛肉丸。手切肥牛（大）份量唔算好多，不過牛味重，肥瘦適中。追加左既白肉，倒埋落煲度好似食極都食唔完咁🤣係好味既，不過五花腩唔敢食咁多。整體黎講鍋底做得相當唔錯。食材亦都無因為半價而將價就貨。服務態度都良好，幾親切。半價後真係好抵，正價的話就貴左d🙈不過係好食既！