蟹點

營業中

休息中

平時黃竹坑返工，周圍無啖好食，今日就決定搭巴士去遠少少搵食，咁啱上咗架去鴨脷洲嘅巴士，落車隔離就有個西邨街市，大大個招牌寫住蟹點，見到就諗住上去試試。夏日熱辣辣熱辣辣好熱好熱！一入去有陣冷氣涼風真係身心舒暢，環境比想像中乾淨好多，空間都好大，無諗過街市都有咁舒適嘅環境。食物選擇方面有港式炒粉麵蒸飯，同時都有泰國菜揀，睇啲牆紙招牌夜晚仲有潮州打冷添，食物種類好豐富。我同朋友分別叫咗海南雞飯同泰國船麵，海南雞大大份，仲有雞髀位，油飯仲有啲香茅粒，食落非常香口。泰國船麵揀咗牛肉湯底，十分之濃味，配安格斯牛肉魚蛋同海鮮，份量啱啱好，下次可以再encore。另外叫咗杯泰式奶茶同椰汁冰，椰汁冰好好飲，夏天飲真係透心涼，泰式奶茶味道都不俗。發掘咗新大陸之後，下次一定會再嚟試其他嘢，發現呢間餐廳真係沙漠中嘅綠洲。