大將 (已結業)

尋日同朋友打邊爐癮起，中午就去左呢間任食打邊爐。我地叫左最貴嘅北海道黑毛和牛餐，每位$348，但可以任食北海道黑毛和牛，我覺得都算值得。呢到係一人一鍋嘅，我同朋友分別揀左完熟番茄海老濃湯同埋芝士咖哩鍋。蕃茄海老濃湯嘅蕃茄味都幾濃，再帶點蝦嘅鮮味。芝士咖哩鍋有啲似平時咖哩味出前一丁個湯底嘅味道，咖哩味超濃郁。北海道黑毛和牛嘅雪花分佈平均，牛味濃。另外我覺得任食嘅山原島阿古豬五花都好好食，肥瘦相間，豬味好香。另外出面有好多任食嘅配料可以夾，包括蔬菜、丸同埋烏冬等等。見到特長蟹棒好吸引，於是我地都加左$32要特長蟹棒，有四條都幾抵食。仲有任食嘅熟食例如炸雞、煎餅、一口甜薯同埋關東煮。任食嘅甜品有泡芙、雪糕、奶凍、木糠布甸等等。但我覺得最出色嘅係自製嘅窩夫，牛油味好香濃，配雪糕一凍一熱都好夾，我竟然食左兩大塊。