校長燒肉日韓料理 (沙咀道) (已結業)

今日去咗荃灣行百貨公司，行到大約七點鐘， 就去眾安街一帶搵下嘢食， 見到有間校長燒肉幾多人排隊， 然後望下價錢都啱食， 所以就攞飛排隊， 等咗大約十分鐘， 店員就安排我哋上去。上到去由於好肚餓嘅關係，所以立即拿了一點熟食， 有章魚丸， 麥樂雞，鹽酥雞粒， 春捲 ，咖哩角等， 小食嘅質素都唔差， 章魚丸同鹽酥雞我都攞多咗碟。食完小食， 就去排隊攞刺身， 有大約七至八款刺身可以選擇， 我揀咗三文魚腩，赤貝，帶子，三種刺身都幾新鮮，我都攞多咗一次。餐廳中間有張沙律吧檯， 放置咗沙律， 甜品， 雜菜等食物。另一邊有張長枱放置了多種肉類， 非常多選擇。第一輪拿了牛仔骨， 香茅豬扒咖哩雞扒，醬醃薄牛扒，醬醃牛肉片， 醬醃牛柳粒等， 鐵板上面放咗張紙， 令燒肉嘅時候， 冇咁容易黐底， 所有肉類都醃得幾入味， 另外檯面都有即磨黑椒， 鹽， 椒鹽粉等調味料供應， 但係我覺得夠味所以都冇用到。烤肉爐旁邊都有一個火鍋用嘅爐， 有三款湯底選擇豬骨湯， 麻辣湯，壽喜燒湯， 如果怕熱氣嘅可以揀火鍋。飲品方面眼見餐廳都幾揼本， 見到有啲貴價啤酒和汽水， 本身有啲想揀啤酒， 但係驚飲飽咗食唔落， 所以揀咗支裝維他奶。