平成二十二日本料理 (已結業)

朋友生日一行5人去食放題，8:30準時開始。當然第一輪一定主攻刺身同壽司,等左大約十分鐘，終於有得食，三文魚劍魚總算新鮮，螺同烏賊一般，最有趣係甜蝦，甜蝦原隻上，即係連殼，咁細隻又軟身，你教我點搣殼！之後一連幾轉魚生後，就到燒物炸物等熱食，先嚟炸蝦，炸粉仲厚過隻蝦，劣！鹽燒豬腸，d豬腸肥到d油成碟都係，劣！點左日式火煱，跟住同我地講話9:00後冇，我入坐時都8:30，又唔講聲，劣！炒飯炒烏冬基本嘢不知所謂，一d誠意都冇，劣！然後每十分鐘先出一碟熱食，劣！！由於熱食嚟的速度真係慢得驚人，所以成晚都係等多過食，最後嚟埋鹽燒蝦同雞翼，可惜太遲嚟，所以唔夠時間食。大約10:00左右，就有人嚟埋單，我地心諗講到明食到10:30，咁快吹埋單！俾錢後我地諗住order 雪糕la, 點知個侍應話cut 左單冇得再叫。我地當然立即表示不滿，跟住有另一位醒目侍應就好客氣咁問我地想要咩雪糕。誰不知從遠處有一位疑似senior嘅人就向果位醒目侍應大叫：＂喂！你第一日返工丫！＂雪糕之嘛！洗唔洗咁丫！之後我地就立即問果個疑似senior 夠竟我地仲有冇雪糕，佢跟手就答＂咩雪糕丫？＂咁我地咪答佢＂你問我地咩味道？＂