百味鮮辣蟹專門店 (已結業)

親戚黎到香港，叫我帶佢去食地道嘅中國菜，我就帶左佢去呢間以辣蟹聞名嘅百味鮮到食 一入到去環境都幾唔錯幾舒服，座位寛闊，環境乾淨。我地點左兩餸一湯，包括必食嘅避風塘炒蟹，燉湯同埋冰鎮咕嚕肉。等左冇耐就有湯飲喇，好大煲入面亦都好足料，有好多種唔同嘅菇、瘦肉同雞腳。店員同我地講個湯燉左十個鐘，飲落真係非常解甜同入味，又冇味精，非常有住家感覺。之後就到我最期待嘅避風塘炒蟹喇，我地係叫左少辣嘅。炒蟹係普通嘅肉蟹，好大隻，上面鋪滿左炸蒜，非常惹味。平時食蟹最怕就係麻煩，但係呢間店嘅廚師非常細心，幫我地預先行剝左殼，省卻好多麻煩之後就到冰鎖咕嚕肉，呢道菜係我同家人好奇之下叫嘅，因為平時食開嘅咕嚕肉都係熱嘅，究竟冰鎮嘅咕嚕肉會係點嘅呢？好奇之下就叫左黎試下，點知非常有驚喜!咕嚕肉係用乾冰冰鎮嘅，賣相非常吸引，佢嘅做法同一般嘅咕嚕肉唔同，反而有啲似拔絲蕃薯咁，食落外層甜甜地非常香脆，而入面就係熱辣辣嘅咕嚕肉，口感非常特別，值得一試!呢餐飯我同親戚都食得非常滿意，佢菜單上仲有好多好吸引嘅菜色，下次要試埋佢😄