初見 (已結業)

今日去左呢間新開既餐廳食午飯，位於旺角上海街，個名叫初見，好詩情畫意！呢間係做日本菜，午市餐牌有洋風/漢堡，和風/咖喱飯，鍋物，日式豚骨湯麵，刺身/壽司，同燒物。價錢大部分都係$100樓下，包熱茶/凍飲。另收加一。今日每人揀左一個餐。廚師發板初見壽司盛10件 $108 另收加一廚師發板初見壽司盛10件上枱時居然用乾冰製造烟霧效果，好驚喜！10件壽司有帶子，甜蝦，赤貝，北寄貝，油甘魚，立魚，三文魚，鯖魚，蔥花吞拿魚蓉軍艦同三文魚籽軍艦。刺身質素普遍及格，赤貝脆口，吞拿魚蓉滑溜，鯖魚就酸酸哋又多汁。仲有兩片玉子同青瓜。飯握得夠實，質感偏濕潤同黏，飯量夠飽。伴有酸薑片，檸檬同wasabi。呢個壽司盛都好有誠意。三文魚蟹籽刺身飯 $68 另收加一三文魚蟹籽刺身飯有6片三文魚，好多脆口蟹籽，蟹柳一條同玉子兩片，仲有青瓜。飯上面已經加左飯素，都夠味。伴有酸薑片，檸檬同wasabi。呢個刺身飯都抵食！凍柚子蜜，忌廉（跟餐）凍柚子蜜甜度適中，夠解渴。忌廉係罐裝。自動送上飲管。座位舒適，位置方便，午市套餐價錢唔貴，可以一試。