成都老碼頭火鍋 (已結業)

有朋友食過呢間成都老碼頭，味道唔錯，今次拉埋我哋一齊去食。有個自取醬料區，可以選擇醬料，任撈任試。 而且有特製香油同乾碟，好正。每款食物都可以選擇半份或者一份，咁就唔怕食唔曬。我哋叫咗個豬骨湯同麻辣湯，麻辣湯底用咗花椒八角草果等香料， 辣得嚟好鮮，非常過癮，至於豬骨湯方面，亦落咗唔少嘅菇菌、蔥、火腿等，好食。我比較欣賞彈牙爽口嘅墨魚丸，入面有粒粒嘅墨魚肉。豬黃喉大小適中，爽脆有口感。呢個牛舌撈咗香油，食落嫩滑有肉味。筷子牛肉都好特別，一條條好似筷子咁，仲撈埋香油芝麻，牛肉食起嚟嫩滑滋味。極品鵝腸非常吸睛 ，一啲都唔肥，唔錯。a4和牛牛頸脊入口即溶，富有牛味，必試。豆卜串串 ， 浸落麻辣湯索汁， 食落過癮。今餐真係食得好飽。