依間冠軍級拉麵店喺威靈頓街轉入去嘅地庫，因為外牆搵 artist 搵滿咗壁畫，都唔係好難搵。其中一幅畫正是來自大阪嘅拉麵大師林隆臣，即係創辦人老細是也，佢攞過好多拉麵比賽冠軍㗎！
至於店內都同樣瀰漫住藝術氛圍，以水泥牆拼木枱凳，牆身又掛咗不少油畫。
林隆臣推介嘅特級白湯一出場，我哋就畀依個巨型拉麵驚艷到，不過細食嘅話可以點細碗版本嘅，所以唔怕食唔哂。
湯底以有機飼養嘅京都丹波有機地雞、日本米鴨同函館籠目昆布熬成，單單係昆布都係用高級嘅貨色，難怪特別鮮味。而麵條就用咗優質日本小麥粉、雞湯同雞蛋，以由日本引入嘅傳統製麵機手工整成，麵質彈牙！
叉燒同溏心蛋都係拉麵中嘅重要角色，總共有三大片經過真空慢煮嘅薄切叉燒呢，溏心蛋都係一整隻。依道嘅叉燒顏色比較粉嫩，食落好柔軟輕盈，好有特色。而溏心蛋蛋黃帶點甜甜哋，味道都幾好～
侍應喺個外賣嘅懷舊「出前箱」攞碗拉麵出嚟，好似睇緊日劇咁，好鬼過癮！
依個黃金味噌拉麵係得獎作品，贏過好多拉麵冠軍，湯底係雞湯底再加上幾十種日本不同縣嘅味噌調製而成，味道濃厚帶少少辣，風味十足。
日式巾着係成個福袋咁嘅腐皮，包咗粉絲、蒟蒻同香蔥，個樣幾可愛。中間嘅肉醬味噌鹹鹹辣辣，而且有肉碎粒，惹味同有口感。
點咗啲小食送啤酒，水準都唔錯。依道有埼玉縣手工啤酒COEDO，我哋點咗一白一黑嘅COEDO・白 Shiro同COEDO・漆黑 Shikkoku，將濃淡口味都一網打盡，哈哈。前者較甜美有果香，後者就甘醇有咖啡香氣。
黑豚腩肉同冠軍拉麵一樣用咗麵豉醬調味，面頭有大量香口嘅葱絲， 佐酒真係一流。
天氣凍就會想食熱辣辣嘅番薯，將番薯整做脆炸波波之後，外面脆卜卜，入面嘅番薯蓉好香甜軟糯，有創意又好好食。
