群記牛肉圓豬手

營業中

休息中

繼上次嘅上水之旅後，今次再度遠征，經一番兜兜轉轉後，終於揾到呢間心儀已久嘅小店，一嘗呢度嘅牛丸及豬手....响粉嶺火車站出嚟，烈日如火，穿過一條又一條嘅天橋及隧道，行咗差唔多成十五分鐘先嚟到聯和墟...原來跟客家菜名店新漢記相距不遠，上次去新漢記行過都冇留意，及後知道原來係名店一間....行完一大段路程，飢火大旺，叫碗牛丸豬手雙併米，先對得住自己....好大嘅一碗嘢，豬手足足有成六至七嚿，最啱鐘意啃骨嘅我。豬手屬清湯豬手，跡近用白烚手法弄成。食落皮有彈性，亦夠膠口；肉亦夠淰糯。但最弊自己不嬲喜歡味較濃嘅食物，呢個食落感覺確實係有點兒"清淡"，但絕不表示呢度嘅水準唔OK。柱候及清湯豬手，可謂各花入各眼，實各有千秋...喝一口湯，好重牛骨味，真材實料。望落去色水淡淡，但飲落卻係頗濃郁，確不俗。使我想起從前係天后華姐飲到嘅，如出一徹...牛丸細細粒，食落尚彈牙，算不錯。但若要小弟選擇，我會選擇投從前旺角樂園一票...但跟上水嘅陳六記、明記腸粉及廣成冰室一樣，呢度位置委實太遠嘞，只能試過就算....