撈喜 (已結業)

今日因為要去筲箕灣開會，lunch要自己一個人食，我第一時間諗起東大街呢間花膠撈麵專門店: 撈喜。我12:00未夠已經到，我應該係第一位客人，餐廳裝修簡約，廚房係半開放式，可以望到師傅備餐。餐牌變動唔大，不過就多左幾款新食品，上次我自己一個人吃撈喜豪華餐，有招花膠撈麵、原盅燉湯、一客小食同一碟菜，由於份量太多，上次食得實在太飽，所以今次只點左一盅燉湯: 魚翅燉雞，同埋黑松露汁花膠撈麵，應該已經好足夠。呢盅魚翅燉雞湯材料好豐富，魚翅份量好多，豬肉雞腳令湯底味道好鮮甜，而且膠質豐富，一個人嘆一盅，好滿足。上次食左招牌花膠撈麵，今次就試下黑松露汁花膠撈麵，份量一樣係咁多，花膠好大件，口感Q彈多汁，黑松露好多混滿整個撈麵，啖啖都係到濃濃嘅黑松露味，麵質爽口彈牙，不過份量對我來說實在太多，下次食應該要叫少麵先食得哂。食完差唔多13:00就開始多人，呢個價錢嘆到優質靚花膠，我諗下次過呢邊開會都係要趁早過黎食先得。