雪花和牛刺身專門店 (已結業)

朋友約食飯黎到雪花和牛刺身專門店，店址更在酒店內，以為價錢一定好離地，點知原來餐牌內食物豐歛由人，有好多不同價格的選擇。頂級的地段，門面頗豪華。店內有不少刻意營造出日本風的飾物。座位算是舒適，但未達酒店級。正如剛剛講到，餐牌內的食物豐歛由人，食物一般同坊間的居酒屋價錢相若，數十至百零蚊有交易。壽司、串燒、卷物等等都有一定質素。燒牛舌水準更加出色，牛味香濃，表面封香，好好食。但一場黎到，當然要試一試和牛吧！一整頁都是A5和牛的菜式，款款吸引，考慮一陣後都係點左厚燒。一上檯嚇親我地，成座山甘高！真材實料，確係件件厚切，而一客有十幾舊，雖然索價$388，但性價比甚高。牛肉每一件燒得剛好，約七至八成熟。和牛的牛脂分佈偏高，每一啖入口都好juicy，味道好濃郁。而配菜亦頗有心思，有好幾款唔同的配搭。隨左招牌的A5和牛，亦有另一款的驚喜食物。同樣係牛，但就係牛肉壽喜燒，牛肉鍋非常足料，有好多件牛肉同各種配菜。湯底甜甜的，臨尾食一碗即刻飽哂，十分滿足。最後埋單每人$600，算是有一點點豪食的感覺，但食到和牛，價格其實都十分合理，並不離地。