德美壽司 (新都城中心1期) (已結業)

由細到大都係新都城呢到長大，最近新開左好多唔同既餐廳，呢間係我行過咁多次都見到好多人食既一間餐廳，今日諗左好耐，決定去試下佢有咩咁勁，要排隊拎飛，人流動得幾快，唔洗等好耐就可以入一枱，但不停都會有好多人黎。入面環境都算好大，地方又乾淨，只係員工冇咩笑容，不過服務都非常周到。原來佢係好多間分店，今次開黎呢到，岩曬我呢Ｄ揸車人士，新都城泊車優惠非常好，100蚊已經可以有一個免費，最多三個鐘。食物方面都非常優惠，佢有幾個套餐選擇，每個套餐都會包一碗麵豉湯，沙津同甜品，百幾蚊有咁多野，真係算唔錯。我就叫左呢個－北海道魚生丼－，都係138蚊，刺身好新鮮，款式都算多，佢有三文魚，帶子，有頭甜蝦，油甘魚等等。男朋友就叫左呢個－活鰻魚樸葉定食－呢個飯等得比較耐，可能係因為我食魚生飯太快，我食完男朋友呢個先到，好特別既木盒去放呢個飯，鰻魚又厚又大條，肉質仲要唔會太淋有小小咬口，又唔會太多骨，好味。前菜既沙津都好好味，入面有一條墨魚刺身，菜唔太苦，配上日本芝麻醬非常好食，麵豉湯唔會咸，最後甜品係豆腐配上芒果醬，非常夾。