允升甜品

營業中

休息中

嚟到長洲玩，又點可以放過長洲名物之一-芒果糯米糍呢(雖然唔明點解會出名)。為食豬本來想食另一間嘅，點知賣晒，咁就揀咗呢一間同樣出名嘅。除咗芒果糯米糍都仲有好多其他甜品可以選擇，為食豬就要咗芒果糯米糍，花生糯米糍，芝麻糊豆花同糖不甩。上枱時見芒果糯米糍個皮黑黑哋色仲以為俾錯咗，原來係紫米皮，都幾特別咁，但其實食落冇咩分別。芒果糯米糍皮薄餡靚，雖然唔係勁大粒但芒果都幾厚肉，而且冬天都食到咁甜咁多汁嘅芒果，抵讚。糯米皮煙煙韌韌，鍾意食mochi嘅為食豬反而想佢厚返少少。另一粒花生糯米糍都係皮薄餡靚，花生餡唔會太碎仲食到一粒粒，好有咬口。糖不甩好抵食，13蚊就有一大碟，不過為食豬揀錯配搭，因為糖不甩根本係解咗體嘅花生糯米糍，但係都好食嘅。芝麻糊豆腐花為食豬就唔推薦喇，芝麻糊好淡，好稀，基本上冇芝麻味。豆腐花唔滑不過都算有豆味嘅。為食豬研究緊長洲其他芒果糯米糍嘅時候，老闆搭嘴同為食豬澄清佢哋嘅芒果糯米糍係始祖，而且只此一家。係唔係真為食豬就不得而知，但下次再嚟都會考慮佢嘅芒果糯米糍，其他就可以不試嚕。