元祖沾麵專門店 (已結業)

尖沙咀厚福街出名多嘢食，今日就揀左間未食過嘅元祖沾麵專門店去食晚餐。門口細細幾日本feel，入到去老公話同日本拉麵店裝修差唔多。坐低左就發現原來櫈下面有個籃比客人放嘢，呢個就係真日本風格喇。見到牆上menu個沾麵咁吸引，我就揀左極上芝士蟹皇沾麵，老公就揀左特製八代海赤海老沾麵。座位旁邊有個食沾麵方法，就算初嘗沾麵都唔怕唔識食。另外沾麵都可以免費加湯，正呀！極上芝士蟹皇沾麵：蟹蓋芝士焗到好香，芝士下面係蟹膏，鹹鹹香香，旁邊仲有蟹子沙律，夠晒味道。沾麵夠粗身，沾左湯唔會淋晒，軟硬適中，用黎做沾麵就啱晒。流心蛋夠流心，煮到剛剛好。筍都唔少，爽口。叉燒四大塊，切得厚薄適中，仲煎過添，入口好香。呢個沾麵湯底係龍蝦湯底，裡面仲有龍蝦肉同豚肉，好濃味。龍蝦肉彈牙，豚肉入味，連個湯都咁足料。湯底用石鍋裝住，黎到仲好滖起晒泡，食到最尾都仲可以keep住熱，真係唔錯。特製八代海赤海老沾麵：沾麵同配料係同我個一樣，老公話湯底好有海鮮味，湯上面D蝦都好香，裡面同樣有豚肉，連湯一齊食真係夠晒濃。佢呢個食到最尾要加湯，原來加湯同樣係即叫即整。第二轉加湯都係滾到起晒泡，絕對係大滿足，連湯飲，勁飽。