酥我行 (已結業)

呢間台灣小食店“酥我行”係餓底我近期嘅新寵 ！！！岩岩開業兩個月，店鋪細細，行過可能會走漏眼。但係當你聞到佢地炸嘢嘅香氣，你就會即刻覺得口痕痕！！！“酥我行”嘅位置係正佳記甜品，亦即係舊B隔離。佢嘅台式小食種類都多。除左有鹽酥雞呀、脆豬扒之外，蔬菜類就有酥炸本菇、金菇，酥炸四季豆都有。如果平日唔鍾意食菜嘅你，可能會試過番尋味。餓底我其實有重度選擇困難症，一路索住飄黎嘅炸嘢香味，一路內心掙扎要叫邊樣。店主大叔好nice咁介紹左幾款炸物，又講下炸本菇同炸金菇嘅分別。餓底最後揀左小辣香酥棒棒豬 ($30)同埋酥炸本菇($20)試試佢。都幾大兜啵，份量足，好有盤滿砵滿嘅感覺。香酥棒棒豬炸到金黃色嘅豬肉條唔肥唔嚡都幾嫩，炸漿薄。面頭有胡椒粉調味。岩哂食肉獸！酥炸本菇結果一食酥炸本菇，餓底毫無抵抗力之餘上左癮添。本菇炸完仲係好juicy，本菇嘅鮮甜同濃郁香味都keep住。嗯～好正！！！香口炸物果然食唔停，食到最後一粒菇個陣，真係好想encore！！雖然熱辣辣食好香口，但食完無喉嚨乾或者好想飲水。香辣小銀魚、鹽酥雞同埋魷魚鬚下次要食！