金記冰室 (粉嶺中心) (已結業)

今時今日嘅茶餐廳已經唔再係平價之選，續新釗記後，金記係粉嶺中心第2間偏向貴價嘅茶記，但食物種類非常多。開業已過一個月，但LUNCH依然要排隊，對比起附近同類型嘅餐廳，顯然仍有其吸引之處。生炸雞髀常餐 $60金記下午茶炸髀加沙律都要$41，呢個SET多左個湯粉、烚蛋同火腿，貴$19，抵唔抵就見人見智，但起碼啱我呢個中意乜都食少少嘅人，食完仲飽足全日添。首先講講主角炸髀，熱辣辣唔再講，外皮香脆，少少椒鹽提味，內裡肉質係滑，而且入味，唔錯。兩球薯仔沙律都唔差，內有薯仔蓉、薯粒、粟米粒、雜果，口感唔錯，不過無食開甜野嘅我就覺得甜得制😅。烚蛋同火腿都係凍嘅，後者應該係白烚，個人覺得煎下佢會好D🤔。湯粉唔係白色果款米粉，而係透明米粉，正正常常。是日午餐 – 咖哩炸魚柳拼牛舌飯 $57+凍飲$2牛舌有兩大塊，幾厚身，肉質軟淋，唔係爽彈口感；但幾有牛味；魚柳好厚身，雖然帶點魚腥，但我可以接受；咖哩正常，但好稀，如果杰身D就好。