古早味台灣原味 (已結業)

 今日又行經銅鑼灣,搵左間古早味台灣餐廳食午餐。午市套餐好多選擇。我好耐無食牛筋,所以㨂左古早味牛肉牛筋麵,同行朋友㨂左賣相好吸引嘅五味雞飯。午餐好平,一套都係70蚊以下,仲包左一杯16蚊嘅台式飲品。我地㨂左炭燒烏龍茶同芋香牛奶。飲品比食物先到。都好大杯,唔會幾啖飲哂,飲足全餐都無問題。套餐仲包左三碟前菜,今日有芽菜、木耳同螺肉。碗麵比左牛肉牛筋兩大件,牛肉咬落好結實易咬開,大大塊咬落去好滿足,調味亦好有台式風味,牛筋口感好淋好舒服,麵條用左闊身麵,好有咬勁,可以沾滿牛肉湯汁,好有味道。五味雞仲包左碗湯,湯好重冬瓜味,紅蘿蔔都好甜。五味雞五道醬都各有特色。左一碟醬入口先甜後辣,比較惹味,左二就係甜酸醬,好開胃,左三係芥末醬,左四帶醋味,但唔會過重,左五則比較香辣。雞肉比左雞脾部位,好滑好易脫骨,有淡淡雞味,點唔同醬都好食。餐廳仲有好多選擇,下次再到會想食芋圓呢。