Xolo (已結業)

話說前一排去食荃灣catee嗰陣時候, 同老闆娘傾計得知佢哋係隔離附近開咗間串燒xolo. 本身自己都好鍾意去catee食飯, 於是搵咗日同老婆一齊去試呢間串燒. 餐廳分開咗內外區域, 裏面嘅裝修有啲似catee佈局走少少古典風格, 內部區域就係有冷氣供應. 我同老婆大約七點鐘到, 經常坐咗一陣已經滿曬位, 場內大約有十張枱多D左右, 感覺上好似啲日本人放工就一齊去搵一個地方坐低吹水同食嘢. 講返啲嘢食先, 本身可能嘅廚房唔係太大, 所以串燒同埋一般料理就唔算太多款式, 我哋就叫左碗雞扒拉麵, 玉子牛肉, 茄子, 翠玉瓜, 杏姑, 蘆筍牛肉卷, 雞皮, 雞腎, 豬肉, 清酒煮蜆. 所有串燒都係可以選擇辣度, 值得一讚係燒出嚟嘅食物品質好有香口炭燒味. 食物分量唔算多但精緻. 所以如果食串燒食唔飽嘅朋友可以叫埋碗拉麵, 因為拉麵好有驚喜, 60零蚊平過出面, 佢裏面嘅雞扒同埋蔬菜配料都係炭燒出嚟, 絕對唔比串燒差, 而且仲有一粒糖心蛋, 粒蛋又係超好食. 餐廳仲有唔同酒類供應, 不過我同老婆就唔飲酒所以就冇叫. 兩個人埋單四百蚊都唔使, 呢餐都幾滿意.