The Captain's House (已結業)

早幾日去左尖沙咀既The Captain's House 食lunch，餐廳最出名嘅就係美式海鮮袋。美式既海鮮袋係源自美國南方港口嘅流行吃法，將煮熟嘅海鮮放入膠袋，加入醬汁後搖一搖調味，然後直接用手拎著吃。今次我哋就揀咗三款海鮮嘅配料，分別係蝦、蜆同埋青口。醬汁就有三款可以選擇，我哋就揀咗唔辣嘅檸檬牛油汁。海鮮袋嘅蝦肉非常彈牙，蜆肉就全部都清甜冇沙，青口雖然比較細隻，但係都非常鮮味。而袋入邊除咗有海鮮之外，仲會有薯仔、粟米同埋豬肉腸，真係十分豐富。尤其是薯仔加上醬汁，味道唔錯。除咗海鮮袋之外，我哋另外都叫咗一個白酒煮活青口，呢份青口所用嘅青口同海鮮袋嘅青口並唔相同，白酒煮青口所用嘅青口Size比較大啲，食落口感更加厚實，而因為用上唔同嘅醬汁，所以味道都唔一樣。我自己就覺得用白酒煮青口更加能夠突出青口嘅鮮味，但冇咗海鮮袋嗰一款惹味嘅醬汁，完全係兩種感覺。除此之外，我哋重點左一個大波波肉醬意粉。呢個肉醬意粉嘅特色之處就係有一個大波波喺意粉上面，而大波波就係一個特大嘅肉丸。肉丸嘅味道比較清淡，稍為欠缺調味，但係肉醬意粉嘅味道就唔錯，酸酸甜甜，幾開胃。